الصـــــــــــــــــــــف

تسير فى الركب لكن العين تنظر خارجه
النظر ممنوع انت فى الحقيقة تتلصص
انت بالتاكيد خائف

انهم يراقبوك
وسيعرفون حتما . وحينها ؟؟
لكنك تريد ان ترى خارج الصف
عقلك يستفزك او ربما ؟؟
لا تعرف فى الحقيقة
لكنك متاكد انك لا تنتمى للصف
احيانا كثيرة تشعر انك تريد ان تكون فى الصف
لا تعلم هل هذه رغبه حقيقة
ام انها مجرد خوف من عقوبة الخروج عن الصف

  • Digg
  • Del.icio.us
  • StumbleUpon
  • Reddit
  • RSS
Read Comments

يوم الام . يوم شم النسيم ... يمكن نستريح

بعض الخطباء ما يصرون دائما فى خطبهم على ان عيد الام .. بدعه وباطل .. ليه نروح نشترى هدايا ليه نخلى ليه يوم للام ما السنة كلها ام ! العجيب ان المرة ده كمان الخطيب قال ليه 21 مارس اشمعنى يعنى ومن عنده كده اضاف
انا قريت ان ده تاريخ انشاء البهائية ! نفس السيناريو هيتكرر اكيد كمان شوية مع عيد شم النسيم وطبعا ده بدعه وباطل وبعدين ده بتاع المسيحين واذا قلت انه فرعونى بقيت اضل سبيلا
انا غير مقتنع بده اطلاقا وشايف انه مجرد تزمت او يمكن مواضيع الخطب المحفوظة عندهم خلصت وبقى نظام خطب المواسم
قضية البدعة يبدو انها كبيرة وانا لست من الاهلية الدينية عشان اتكلم فيها كل اللى ممكن اكلم عنه هو علاقة عيد الام وعيد شم النسيم بالدين انا مش شايف انهم لهم علاقة ابدا بالدين اذا كانت المشكلة فى كلمة عيد عشان الاسلام مفيهوش غير عيدين تبقى بسيطة نخليها يوم ايه المانع تبقى يوم الام ويوم شم النسيم يمكن يستريحوا
نجى للى بيحصل فيهم
يوم الام مش معناه ان احنا ننسى الام طول السنة ونفتكرهم فى اليوم ده مين قال كده ببساطة اليوم ده معناه ان كل واحد ناسى والدته على الاقل يفتكرها فى اليوم ده واللى مهتم بوالدته كل يوم يزود فى اليوم ده
طب ليه
ببساطة عشان فكرة التجمع لما بيبقى الناس كلها فى شرقها وغربها بيقولوا للام كل سنة وانت طيبة وان احنا اسفين لو قصرنا معاكى فى حاجة وهدية رمزية اكيد احساس تانى للام بانها متوجه فى اليوم ده بالذات انه يومها وانه عيدها فى السنة وان كل العالم مش ابنها بس اللى مهتم بيها
ببساطة فى راييى زى فكرة رمضان من السنة كل الناس بتصوم فى الشهر ده ومعروف طبعا ان فى صوم طول السنة
ويوم شم النسيم يوم ترييح الاعصاب يوم كل الناس فيه تطلع للخضرة من كبت الدنيا وشغل مستمر للطبيعة
تحس كده ان احنا بنرجع لاصلنا الخضرة والميه
اما حكاية الاكل والبيض وخلافه فهى مجرد عادات من ايام الفراعنه لاننا بنحتفل بيه من ايامهم وعلاقته مش بالمسيحين الفكرة انه تقويمه قبطى والقبط ليسوا المسيحين فقط كل مصر قبط
والتقويم المصرى هو التقويم القبطى ويعرفه كل مصرى خاصة الفلاحين سواء كانوا مسلمين او مسيحين واسال اى حد منهم عن كيهك وهاتور وبابه وامشير وخلافه
مش عارف بس حاسس ان احنا بنحبكها شويتين تلاته والتحذيرات تبدا من هنا ومن هنا البدعة والضلاله واياكم
كل ده ليه طيب والموضوع ابسط من كده قوى
عامة كل سنة وانت طيبة يا امى وكل سنة واحنا طيبيبن فى يومى الام وشم النسيم

  • Digg
  • Del.icio.us
  • StumbleUpon
  • Reddit
  • RSS
Read Comments

مصر بعد التعديل ..." والله وهتهيص يا معوض ! "


يمكن كتير فى مصر زعلانين بجد عشان الدستور وتعديلاته لكن العجيب ان فى الفترة اللى فاتت لاحظت ا ن فى ناس فرحانه بالتعديل . اه والله صدق . اركب مواصله فى بلد ريفى امشى جنب غيط وشوف الفلاحين فى قعدتهم بيقولوا ايه
اسمع ودقق
هتلاقيهم بيحسدوا الغفير على المكانه الجديدة والسلطات الجامدة.!
احيانا بيتهيالى انهم بيتكلموا عن سلطان زمانه او عتريس فى افلام زمان

فى احد العربات حدث قدامى ما معناه هذا الحديث بين مجموعه من البسطاء
" موظف وفلاح وغفير وناس عادية دخلت فى الحوار كعاده المصريين "

" بيقولك الغفير بعد كده يقدر ياخد اى حد "

" لا وكمان يقدر يخش اى دار كده يزق الباب وياخد ويلم زى ما هو عايز "

الفلاح يضحك .." والله هتهيص يا معوض..!"

الغفير يزمزم !

الموظف " ولاد ال ... ما هى ناقصة "

الفلاح " اه يا عم خليهم يعيشوا يومين اه يا بلد . ده انا امبارح الغفير .... عارفه ؟ حمارته بس دخلت فى البرسيم بتاعى وكلت منه بقوله لم الحمار بتاعك قالى هو عمل حاجة ردحتله اه والنبى مخلتلوش ولو كان فتح بقه كان خد على دماغه ... " يبص جنبه للغفير " والله هتهيص ! "

الغفير بيزمزم وساكت ...( ليه معرفش بس عرفت بعد كده ! )

مواطن يدخل فى الكلام " ربنا يحفظنا "

الفلاح يسال الموظف " بالمناسبة الا فى الدستور ده هيسهلوا البنا على الارض الزراعية "!

الموظف " والله مانا عارف" !

الفلاح " بكلم بجد والله "!

مواطن " هههههه ده دستور يا حاج ... هيعملوا ماده 179 بدل الطوارىء كده هيخلوها فى الدستور "

الفلاح باين عليه مفهمش قوى بس جاله اكتئاب " امال احنا قلنا نعم على ايه !"

وبعدين بيكلم الموظف " ما نتش عارف ليه امال كنت ماسك لجنة ازاى " !

الموظف " قاعد فيها هعمل ايه يعنى .." شكله كان مهموم فعلا .. " رئيس اللجنة خد 100 جنيه "

الفلاح " 100 جنيه ... وبيبص لمعوض " هتلاقيك هيصت يا معوض "

الغفير اخيرا بيكلم " 100 جنيه يا نهار اسوخ ده كله اللى حصلناه 7 جنيه "

الموظف " يا عم مادولك النهارده كمان اجازه "

الغفير يشاور بغضب " ده احنا اشتغلنا امبارح لما هلكنا "

الموظف " اه نملا الورق .!"

المواطن " ههه محدش راح اساسا "

الفلاح " وانت عايزهم ميملهوش "

الموظف " الناس مجتش والورق لازم يتعلم "

الفلاح " املى يا عم املى انت تقدر متملاش "!

الغفير " كله على دماغنا ده احنا دخنا نشيل ونحط فى الصناديق وبسبعة جنيه "

الموظف " احمد ربك على الاجازه ياعم ما دوك يوم بحاله"
مواطن .. " والله هتهيص يا معوض .!"
**********************************************





  • Digg
  • Del.icio.us
  • StumbleUpon
  • Reddit
  • RSS
Read Comments